ನಿಖರ ಹವಾಮಾನ ವಿಶ್ಲೇಷಣೆ ಮೂಲಕ ರೈತರ ಬಂಧು: ಸಾಯಿಶೇಖರ್ ಕರ್ಕಳ ಅವರಿಗೆ ಗೌರವಾನ್ವಿತ ‘ರೈತ ರತ್ನ’ ಪ್ರಶಸ್ತಿ ಗರಿ!

ಸಾಯಿಶೇಖರ್ ಕರ್ಕಳ ರೈತ ರತ್ನ ಪ್ರಶಸ್ತಿ; ಮಳೆ, ಗಾಳಿ, ಬಿಸಿಲಿನ ಏರಿಳಿತಗಳನ್ನು ಆಧರಿಸಿ ಕೃಷಿ ಮಾಡಬೇಕಾದ ಇಂದಿನ ಸನ್ನಿವೇಶದಲ್ಲಿ ರೈತರಿಗೆ ಸರಿಯಾದ ಸಮಯಕ್ಕೆ ನಿಖರವಾದ ಹವಾಮಾನ ಮಾಹಿತಿ ಸಿಗುವುದು ಅತ್ಯಂತ ಅಗತ್ಯ. ಇಂತಹ ಕಠಿಣ ಸವಾಲಿನ ನಡುವೆ ತಮ್ಮ ನಿರಂತರ ಹಾಗೂ ನಿಷ್ಕಾಮ ಸೇವೆಯ ಮೂಲಕ ಕರಾವಳಿ ಸೇರಿದಂತೆ ರಾಜ್ಯಾದ್ಯಂತ ಲಕ್ಷಾಂತರ ರೈತ ಕುಟುಂಬಗಳಿಗೆ ದಾರಿದೀಪವಾಗಿರುವ ದಕ್ಷಿಣ ಕನ್ನಡ ಜಿಲ್ಲೆಯ ಸಾಯಿಶೇಖರ್ ಜಿ. ಕರ್ಕಳ ಅವರ ಸೇವೆಯನ್ನು ಗುರುತಿಸಿ ಗೌರವಿಸಲಾಗಿದೆ. ಪ್ರಮುಖ ಮಾಧ್ಯಮ ಸಂಸ್ಥೆಯಾದ ‘ಕನ್ನಡ ಪ್ರಭ – ಸುವರ್ಣ ನ್ಯೂಸ್’ ನೀಡುವ ಪ್ರತಿಷ್ಠಿತ ‘ರೈತ ರತ್ನ’ (Season 6) ಪ್ರಶಸ್ತಿಗೆ ಸಾಯಿಶೇಖರ್ ಅವರು ಭಾಜನರಾಗುವ ಮೂಲಕ ಕೃಷಿ ಕ್ಷೇತ್ರಕ್ಕೆ ಹೊಸ ಮೆರಗು ತಂದಿದ್ದಾರೆ.

​ಕೃಷಿ ಕ್ಷೇತ್ರಕ್ಕೆ ವಿಶಿಷ್ಟದಲ್ಲೇ ವಿಶಿಷ್ಟವಾದ ಕೊಡುಗೆ ನೀಡುತ್ತಿರುವ ಸಾಯಿಶೇಖರ್ ಅವರು ಆಧುನಿಕ ತಂತ್ರಜ್ಞಾನ ಮತ್ತು ಹವಾಮಾನ ಉಪಗ್ರಹಗಳ ದತ್ತಾಂಶಗಳನ್ನು ಅತ್ಯಂತ ಸರಳವಾಗಿ ವಿಶ್ಲೇಷಿಸಿ, ಸ್ಥಳೀಯ ಭಾಷೆಯಲ್ಲಿ ರೈತರಿಗೆ ತಲುಪಿಸುವ ಕಾರ್ಯವನ್ನು ಅತ್ಯಂತ ಅಚ್ಚುಕಟ್ಟಾಗಿ ಮಾಡುತ್ತಾ ಬಂದಿದ್ದಾರೆ. ಕೃಷಿಕರು ಯಾವ ಸಮಯದಲ್ಲಿ ಬಿತ್ತನೆ ಮಾಡಬೇಕು, ಗೊಬ್ಬರ ಹಾಗೂ ಕ್ರಿಮಿನಾಶಕ ಸಿಂಪಡಿಸಬೇಕು ಮತ್ತು ಕೊಯ್ಲು ಮಾಡಿದ ಫಸಲನ್ನು ಎಂದು ರಕ್ಷಿಸಿಕೊಳ್ಳಬೇಕು ಎಂಬುದರ ಕುರಿತು ಅವರು ನೀಡುವ ಮುನ್ಸೂಚನೆಗಳು ಕೃಷಿಕರಿಗೆ ಕೋಟ್ಯಂತರ ರೂಪಾಯಿ ನಷ್ಟವಾಗುವುದನ್ನು ತಪ್ಪಿಸಿವೆ. ಯಾವುದೇ ಆರ್ಥಿಕ ಲಾಭದ ನಿರೀಕ್ಷೆಯಿಲ್ಲದೆ, ಕೇವಲ ರೈತರ ಹಿತದೃಷ್ಟಿಯಿಂದಲೇ ಹಗಲಿರುಳು ಈ ಸೇವೆಯಲ್ಲಿ ತೊಡಗಿಸಿಕೊಂಡಿರುವ ಅವರ ಶ್ರಮಕ್ಕೆ ಈ ‘ರೈತ ರತ್ನ’ ಪ್ರಶಸ್ತಿಯು ಸೂಕ್ತ ಗೌರವ ತಂದಿತ್ತಿದೆ.

​ಸಾಮಾನ್ಯವಾಗಿ ಹವಾಮಾನ ಇಲಾಖೆಯ ವರದಿಗಳು ಗ್ರಾಮೀಣ ಭಾಗದ ಕೊನೆಯ ರೈತನಿಗೆ ಅರ್ಥವಾಗುವುದು ಕಷ್ಟಕರವಾಗಿರುತ್ತದೆ. ಆದರೆ ಸಾಯಿಶೇಖರ್ ಅವರು ತಮ್ಮ ನಿಖರ ವಿಶ್ಲೇಷಣೆಯನ್ನು ವಾಟ್ಸಾಪ್, ಸೋಶಿಯಲ್ ಮೀಡಿಯಾ ಹಾಗೂ ಮಾಧ್ಯಮಗಳ ಮೂಲಕ ಪ್ರತಿಯೊಬ್ಬ ಕೃಷಿಕನಿಗೂ ತಲುಪುವಂತೆ ಮಾಡಿದ್ದಾರೆ. ಪ್ರಕೃತಿಯ ವಿಕೋಪಕ್ಕೆ ಸಿಲುಕಿ ನಲುಗುತ್ತಿದ್ದ ರೈತರಿಗೆ ಇವರ ಸಮಯೋಚಿತ ಮಾಹಿತಿಯೇ ಭರವಸೆಯ ಬೆಳಕಾಗಿದೆ. ಕೃಷಿಯನ್ನೇ ನೆಚ್ಚಿಕೊಂಡಿರುವ ಲಕ್ಷಾಂತರ ಕುಟುಂಬಗಳಿಗೆ ನೆರವಾದ ಇಂತಹ ಅನರ್ಘ್ಯ ರತ್ನಕ್ಕೆ ‘ರೈತ ರತ್ನ’ ಗೌರವ ಸಿಕ್ಕಿರುವುದು ಕೇವಲ ಸಾಯಿಶೇಖರ್ ಅವರಿಗೆ ಮಾತ್ರವಲ್ಲ, ಒಟ್ಟಾರೆ ಕೃಷಿ ಕ್ಷೇತ್ರಕ್ಕೆ ಹಾಗೂ ರಾಜ್ಯದ ಸಮಸ್ತ ರೈತ ಸಮುದಾಯಕ್ಕೆ ಸಂದ ಗೌರವವಾಗಿದೆ.