ಟ್ವಿಟರ್‌ನಲ್ಲಿ ಕಣ್ಣೀರಿಟ್ಟವರು ಮೈಸೂರಿಗೆ ಬರಲೇ ಇಲ್ಲ! ಜಾನಕಮ್ಮನವರ ಅಂತಿಮ ಯಾತ್ರೆಯಲ್ಲಿ ಎದ್ದು ಕಾಣಿಸಿತು ಚಿತ್ರರಂಗದ ಮಹಾ ಅಸಡ್ಡೆ! ಎಸ್ ಜಾನಕಿ ಅಂತಿಮ ಸಂಸ್ಕಾರ

ಎಸ್ ಜಾನಕಿ ಅಂತಿಮ ಸಂಸ್ಕಾರ; “ಯಾವ ಮೋಹನ ಮುರಳಿ ಕರೆಯಿತೋ, ದೂರ ತೀರಕ್ಕೆ ನಿನ್ನನು…” ಎಂಬ ಕವಿ ಡಾ. ಗೋಪಾಲಕೃಷ್ಣ ಅಡಿಗರ ಹಾಡಿನಂತೆ ಭಾರತದ ಗಾನ ಕೋಗಿಲೆ ಎಸ್. ಜಾನಕಮ್ಮನವರು ಭೌತಿಕವಾಗಿ ನಮ್ಮನ್ನು ಅಗಲಿದ್ದಾರೆ. ಮೈಸೂರಿನ ಏನ್.ಆರ್.ಮೊಹಲ್ಲಾದ ನವೀನ್ ಎಂಬ ಪರಮ ಅಭಿಮಾನಿಯ ಬೋಗಾದಿ ರಸ್ತೆಯ ಸಮೀಪವಿರುವ ತೋಟದಲ್ಲೇ ಅವರ ಅಂತ್ಯಕ್ರಿಯೆ ನೆರವೇರಿದೆ. ಆದರೆ, ಈ ಅಂತಿಮ ಯಾತ್ರೆಯ ಸಂದರ್ಭದಲ್ಲಿ ಕಂಡುಬಂದ ದೃಶ್ಯಗಳು ಮಾತ್ರ ಕೋಟ್ಯಂತರ ಸಂಗೀತ ಪ್ರೇಮಿಗಳಲ್ಲಿ ತೀವ್ರ ನಿರಾಶೆ ಹಾಗೂ ಬೇಸರವನ್ನು ಉಂಟುಮಾಡಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಈಗ ಇದೇ ವಿಷಯದ ಬಗ್ಗೆ ದೊಡ್ಡ ಮಟ್ಟದ ಚರ್ಚೆ ಮತ್ತು ಆಕ್ರೋಶ ವ್ಯಕ್ತವಾಗುತ್ತಿದ್ದು, “ಗಾಯನದ ಮೇರು ಪರ್ವತಕ್ಕೆ ಸಲ್ಲಬೇಕಾದ ಅಂತಿಮ ಗೌರವ ಸಲ್ಲಿಕೆಯಾಗಲಿಲ್ಲವೇ?” ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ.

ದೂರ ನಿಂತ ಗಣ್ಯರು: ಕೇವಲ ಮಾತಿಗಷ್ಟೇ ಸೀಮಿತವಾಯಿತೇ ಸಾಧನೆಯ ಹೊಗಳಿಕೆ?

ದೂರದ ಯಾವುದೋ ರಾಜ್ಯಗಳಲ್ಲಿ ಕುಳಿತುಕೊಂಡು ಜಾನಕಮ್ಮನವರ ಸಾಧನೆ, ಅವರ ಗಾಯನ ಶೈಲಿ ಮತ್ತು ಕೊಡುಗೆಯನ್ನು ಟ್ವಿಟರ್, ಫೇಸ್‌ಬುಕ್‌ನಲ್ಲಿ ಕೊಂಡಾಡಿದ ಚಿತ್ರರಂಗದ ಅದೆಷ್ಟೋ ಮಹನೀಯರು, ಅಂತಿಮ ದರ್ಶನದ ಸಂದರ್ಭದಲ್ಲಿ ಪ್ರತ್ಯಕ್ಷವಾಗಿ ಕಾಣಸಿಗಲೇ ಇಲ್ಲ. ಗಾಯನ ಕ್ಷೇತ್ರಕ್ಕೆ ಜಾನಕಮ್ಮ ನೀಡಿದ ಕೊಡುಗೆಯ ಬಗ್ಗೆ ಭಾಷಣ ಬಿಗಿದ ನೂರಾರು ಗಣ್ಯರ ಪೈಕಿ, ಅಂತಿಮ ಯಾತ್ರೆಯ ಸನ್ನಿವೇಶದಲ್ಲಿ ಖುದ್ದಾಗಿ ಬಂದು ಸೌಜನ್ಯಕ್ಕೂ ಗೌರವ ಸಲ್ಲಿಸಿದವರು ಕೇವಲ ಬೆರಳೆಣಿಕೆಯಷ್ಟು ಮಂದಿ ಮಾತ್ರ. ಅದೆಷ್ಟೋ ಜನಪ್ರಿಯ ನಟರು, ನಿರ್ದೇಶಕರು ಮತ್ತು ಸಹ-ಕಲಾವಿದರು ಕನಿಷ್ಠ ಸೌಜನ್ಯಕ್ಕಾದರೂ ಬಂದು ಅಂತಿಮ ನಮನ ಸಲ್ಲಿಸದೇ ಹೋದದ್ದು ಅಭಿಮಾನಿಗಳ ಮನಸ್ಸಿಗೆ ತೀವ್ರ ಆಘಾತ ತಂದಿದೆ.

ಪಕ್ಕದ राज्यಗಳ ನಡೆಗೆ ಆಕ್ರೋಶ: ಜಾನಕಮ್ಮ ಕೇವಲ ಕರ್ನಾಟಕದ ಆಸ್ತಿಯಾಗಿರಲಿಲ್ಲ!

ಎಸ್. ಜಾನಕಿ ಅವರು ಕೇವಲ ಕನ್ನಡಕ್ಕಷ್ಟೇ ಸೀಮಿತವಾದವರಲ್ಲ. ತಮಿಳು, ತೆಲುಗು, ಮಲಯಾಳಂ ಮತ್ತು ಹಿಂದಿ ಸೇರಿದಂತೆ 20 ಭಾಷೆಗಳಲ್ಲಿ 48 ಸಾವಿರಕ್ಕೂ ಅಧಿಕ ಗೀತೆಗಳನ್ನು ಹಾಡಿದವರು. ತಮ್ಮ ಗಾಯನದ ಮೂಲಕ ದಶಕಗಳ ಕಾಲ ಸೇವೆ ಸಲ್ಲಿಸಿದ್ದ ಜಾನಕಮ್ಮ ಅವರನ್ನು ಪಕ್ಕದ ಕೇರಳ, ತಮಿಳುನಾಡು ಮತ್ತು ಆಂಧ್ರಪ್ರದೇಶ ಸರ್ಕಾರಗಳು ಸಂಪೂರ್ಣವಾಗಿ ಕಡೆಗಣಿಸಿಬಿಟ್ಟವಾ? ಆ ಸರ್ಕಾರಗಳ ಪ್ರತಿನಿಧಿಗಳು ತೋರಿದ ಉದಾಸೀನತೆ ನಿಜಕ್ಕೂ ಅವಮಾನಕಾರಿ ಎಂದು ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕರ್ನಾಟಕ ಸರ್ಕಾರದಿಂದ ಜಾನಕಮ್ಮನವರಿಗೆ ಸರ್ಕಾರಿ ಗೌರವ ಸಲ್ಲಿಕೆಯಾಗಿದ್ದರೂ ಸಹ, ಅವರ ಹಿರಿಮೆ ಮತ್ತು ಸಾಂಸ್ಕೃತಿಕ ಸ್ಥಾನಮಾನಕ್ಕೆ ಹೋಲಿಸಿದರೆ ಇನ್ನಷ್ಟು ಹೆಚ್ಚಿನ ಹಾಗೂ ಭವ್ಯವಾದ ಗೌರವ ಸಿಗಬೇಕಿತ್ತು ಎನ್ನುವುದು ಸಾರ್ವಜನಿಕರ ಅಭಿಪ್ರಾಯವಾಗಿದೆ. ಅವರ ಭೌತಿಕ ಶರೀರ ಅಳಿಯಬಹುದು, ಆದರೆ ಅವರ ಶಾರೀರ ಮಾತ್ರ ಯಾವತ್ತೂ ಜೀವಂತವಾಗಿರುತ್ತದೆ. ಹೋಗಿ ಬನ್ನಿ ಅಮ್ಮ, ನಿಮ್ಮ ದಿವ್ಯ ಆತ್ಮಕ್ಕೆ ಶಾಂತಿ ಸಿಗಲಿ.